حکومت اور متعلقہ ترقیاتی ادارے شہری ترقیاتی پالیسیوں میں بڑے پیمانے پر اصلاحات متعارف کرانے کی تیاری کر رہے ہیں، جن کا بنیادی مقصد شہروں میں بے ہنگم افقی پھیلاؤ (Urban Sprawl) کو روکنا اور باقی ماندہ گرین ایریاز کا تحفظ یقینی بنانا ہے۔
نئی مجوزہ پالیسیوں کے تحت رہائشی اور کمرشل منصوبوں میں عمودی تعمیرات (Vertical Construction) کی حوصلہ افزائی کی جائے گی تاکہ محدود شہری زمین کا مؤثر استعمال ممکن بنایا جا سکے۔
ذرائع کے مطابق حکام کا مؤقف ہے کہ مسلسل افقی توسیع کے باعث زرعی زمینیں اور سبز مقامات تیزی سے ختم ہو رہے ہیں، جس سے ماحولیاتی مسائل اور شہری انفراسٹرکچر پر دباؤ بڑھ رہا ہے۔ اسی تناظر میں بلند و بالا رہائشی منصوبوں، اپارٹمنٹ کمپلیکسز اور ہائی رائز عمارتوں کیلئے قواعد میں نرمی اور نئی مراعات دیے جانے کا امکان ہے۔
ماہرین کا کہنا ہے کہ اگر یہ اصلاحات مؤثر انداز میں نافذ کی گئیں تو اس سے نہ صرف گرین اسپیس محفوظ رہیں گے بلکہ ٹریفک، شہری سہولیات اور آبادی کے دباؤ جیسے مسائل پر بھی قابو پانے میں مدد مل سکتی ہے۔
