پاکستان کے نامور فلسفی، وکیل اور دانشور رضا کاظم انتقال کرگئے۔ وہ 13 جنوری 1930 کو پیدا ہوئے اور اپنی علمی، فکری اور قانونی خدمات کے باعث ایک منفرد شناخت رکھتے تھے۔
رضا کاظم نے اپنی سیاسی زندگی کا آغاز 1942 میں برصغیر کی مشہور ہندوستان چھوڑو تحریک کے دوران ایک طالبعلم کی حیثیت سے احتجاج میں حصہ لے کر کیا۔ بعد ازاں 1948 میں انہوں نے کمیونسٹ پارٹی آف پاکستان میں شمولیت اختیار کی، تاہم نظریاتی اختلافات کے باعث 1951 میں سیاست سے کنارہ کشی اختیار کرلی۔
انہوں نے 1953 میں وکالت کے شعبے میں قدم رکھا اور جلد ہی ایک ممتاز وکیل کے طور پر پہچان بنائی۔ بطور کارکن وہ مختلف ادوار میں آمریت کے خلاف آواز بلند کرتے رہے، جس کے باعث انہیں ایوب خان، ذوالفقار علی بھٹو اور ضیاء الحق کے ادوار میں جیل بھیجا گیا۔
رضا کاظم نہ صرف ایک ماہر قانون دان تھے بلکہ فلسفے اور علم کے میدان میں بھی ان کی خدمات کو ہمیشہ یاد رکھا جائے گا۔ ان کے انتقال سے ملک ایک بڑے دانشور سے محروم ہوگیا ہے۔
