سینئر کلاسیکل گلوکارہ ترنم ناز کا اعتراف: بچوں کے نام گھر دینا میری زندگی کی سب سے بڑی غلطی
ترنم ناز نے جذباتی انداز میں کہا کہ جب بچے بڑے ہوئے اور ان کی شادی ہوئی تو وہ گھر میں حصہ مانگنے لگے۔
سینئر کلاسیکل گلوکارہ ترنم ناز کا اعتراف: بچوں کے نام گھر دینا میری زندگی کی سب سے بڑی غلطی
پاکستان کی معروف اور سینئر کلاسیکل غزل گلوکارہ ترنم ناز نے حال ہی میں ایک ٹی وی شو میں زندگی کے سب سے دکھ بھرے لمحے کے بارے میں بات کرتے ہوئے انکشاف کیا کہ اپنی محنت کی کمائی سے بنایا گیا گھر بچوں کے نام کر دینا ان کی زندگی کی سب سے بڑی غلطی تھی۔
شو کے دوران میزبان نے ترنم ناز سے سوال کیا کہ ان کی زندگی کا سب سے غمگین لمحہ کون سا تھا، جس پر گلوکارہ نے بتایا کہ انہوں نے اپنی کمائی سے زمین خریدی اور دل سے اپنا گھر بنایا۔ چونکہ بچے اس وقت چھوٹے تھے، اس لیے انہوں نے گھر بچوں کے نام کر دیا تاکہ مستقبل میں کوئی مسئلہ نہ ہو۔
ترنم ناز نے جذباتی انداز میں کہا کہ جب بچے بڑے ہوئے اور ان کی شادی ہوئی تو وہ گھر میں حصہ مانگنے لگے۔ انہوں نے اعتراف کیا کہ والدین کی حیثیت اور اہمیت تب زیادہ محسوس ہوتی ہے جب وہ خود اپنی پراپرٹی کے مالک ہوں۔ ان کا کہنا تھا کہ اگر گھر ان کے نام رہتا تو صورتحال زیادہ بہتر اور مختلف ہوتی۔
ترنم ناز کو پی ٹی وی کے کلاسیکل گانوں اور طاقتور آواز کے لیے یاد کیا جاتا ہے۔ وہ استاد عاشق حسین کی شاگردہ رہ چکی ہیں اور ان کی آواز میں میڈم نور جہاں کی جھلک بھی سننے کو ملتی ہے۔ انہیں ان کی خدمات کے اعتراف میں پرائڈ آف پرفارمنس بھی دیا جا چکا ہے۔
