رمضان المبارک 1447 ہجری کے چاند سے متعلق سائنسی پیشگوئی جاری کر دی گئی ہے، جس کے مطابق پاکستان میں یکم رمضان بروز جمعرات 19 فروری 2026 کو ہونے کا امکان ظاہر کیا جا رہا ہے۔
سپارکو کے ترجمان کے مطابق نئے قمری مہینے کا چاند 17 فروری 2026 کو پاکستانی وقت کے مطابق شام 5 بج کر 1 منٹ پر پیدا ہوگا۔ ماہرین فلکیات کے حساب سے 18 فروری 2026 کو غروبِ آفتاب کے وقت چاند کی عمر تقریباً 25 گھنٹے اور 48 منٹ ہوگی، جو رویت کے لیے موزوں سمجھی جاتی ہے۔
ترجمان کے مطابق ساحلی علاقوں میں غروبِ آفتاب اور غروبِ مہتاب کے درمیان تقریباً 59 منٹ کا وقفہ متوقع ہے، جو چاند دیکھنے کے امکانات کو مزید بڑھا سکتا ہے۔ فلکیاتی اعداد و شمار کے تحت 18 فروری کی شام آنکھ سے چاند نظر آنے کے واضح امکانات موجود ہیں۔
تاہم رمضان المبارک کے آغاز کا باضابطہ اور حتمی اعلان ہمیشہ کی طرح رویتِ ہلال کمیٹی پاکستان کی جانب سے کیا جائے گا، جو شہادتوں اور شرعی اصولوں کی روشنی میں فیصلہ جاری کرتی ہے۔
ماہرین کا کہنا ہے کہ سائنسی اندازے رہنمائی فراہم کرتے ہیں، لیکن اسلامی مہینے کے آغاز کا انحصار سرکاری اعلان پر ہی ہوتا ہے۔
