پنجاب وائلڈ لائف کی بڑی کارروائی، ایک دن میں غیر قانونی رکھے گئے 57 شیر برآمد، 8 افراد گرفتار
محکمہ وائلڈ لائف پنجاب نے صوبے کے مختلف شہروں میں بیک وقت کارروائیاں کرتے ہوئے غیر قانونی طور پر رکھے گئے 57 شیر اور دیگر جنگلی جانور تحویل میں لے لیے جبکہ 8 افراد کو حراست میں لیا گیا۔
ترجمان محکمہ وائلڈ لائف کے مطابق 24 جنوری کو پنجاب بھر میں ایسے افراد کے خلاف کریک ڈاؤن کیا گیا جو قانون کی خلاف ورزی کرتے ہوئے شیر اور دیگر جنگلی حیات کو نجی ملکیت میں رکھے ہوئے تھے۔ کارروائیاں مختلف اضلاع میں کی گئیں جن کے دوران بڑی تعداد میں جانور برآمد ہوئے۔
لاہور میں بیدیاں روڈ کے قریب واقع ایک فارم ہاؤس سے 20 شیر تحویل میں لیے گئے، جبکہ جہلم کی ایک نجی ہاؤسنگ سوسائٹی سے 23 شیر برآمد کیے گئے۔ اسی طرح ملتان کینٹ کے ایک فارم ہاؤس سے 9 شیر اور ایک بندر قبضے میں لیا گیا۔
وائلڈ لائف حکام کے مطابق لاہور سے 4 جبکہ ملتان اور جہلم سے ایک، ایک ملزم کو گرفتار کیا گیا۔ مزید یہ کہ گوجرانوالہ کی ایک ہاؤسنگ سوسائٹی سے 3 شیر اور سیالکوٹ کے گاؤں لوتھر میں ایک رہائش گاہ سے 2 شیر برآمد کر کے ایک، ایک شخص کو قانون کی گرفت میں لیا گیا۔
محکمہ وائلڈ لائف نے واضح کیا ہے کہ غیر قانونی طور پر جنگلی جانور رکھنے والوں کے خلاف کارروائیاں جاری رہیں گی اور قانون کے مطابق سخت اقدامات کیے جائیں گے۔
