اے این پی ختم نہیں ہوئی، پختون عوام ہمارے ساتھ ہیں: ایمل ولی خان
عوامی نیشنل پارٹی (اے این پی) کے سربراہ ایمل ولی خان نے کہا ہے کہ ملک میں سیاسی اور حکومتی نظام ہائبرڈ شکل اختیار کر چکا ہے، جس میں مختلف سیاسی قوتیں شامل ہو چکی ہیں۔ انہوں نے کہا کہ اس صورتحال میں سابق صدر آصف علی زرداری اور ان کی جماعت بھی شامل نظر آتی ہے۔
کراچی میں باچا خان کی برسی کے موقع پر منعقدہ جلسے سے خطاب کرتے ہوئے ایمل ولی خان نے کہا کہ جو عناصر یہ سمجھتے تھے کہ عوامی نیشنل پارٹی سیاست سے ختم ہو چکی ہے، وہ حقیقت دیکھ لیں۔ ان کے مطابق باچا خان اور ولی خان کی سیاسی جدوجہد کو تاریخ سے مٹایا نہیں جا سکتا۔
اے این پی سربراہ نے کہا کہ کراچی میں مقیم پختون عوام نے یہ ثابت کر دیا ہے کہ وہ عوامی نیشنل پارٹی کے ساتھ کھڑے ہیں۔ انہوں نے اس تاثر کو بھی رد کیا کہ پختون قوم کسی ایک مخصوص جماعت یا شدت پسند سوچ کے ساتھ جڑی ہوئی ہے۔
ایمل ولی خان نے تیراہ کے حالات پر تشویش کا اظہار کرتے ہوئے کہا کہ وہاں کے عوام بے بسی کے عالم میں اپنے گھروں سے نقل مکانی پر مجبور ہیں، جبکہ وفاقی حکومت کی جانب سے خیبر پختون خوا کو نظر انداز کیا جا رہا ہے۔ ان کا کہنا تھا کہ انسانی حقوق کی پامالی پر خاموشی افسوسناک ہے۔
انہوں نے مطالبہ کیا کہ تیراہ کے عوام کو اپنے مستقبل کے فیصلوں میں شامل کیا جائے اور کسی صورت دہشت گردوں کی معاونت برداشت نہیں کی جا سکتی۔ ایمل ولی خان کے مطابق اے این پی پورے ملک میں امن کی خواہاں ہے، کیونکہ لاکھوں پختون کراچی، لاہور اور بلوچستان سمیت مختلف شہروں میں آباد ہیں اور ان کے حقوق کا تحفظ ضروری ہے۔
انہوں نے کہا کہ پختون قوم کے لیے ایک پُرامن اور مستحکم پاکستان ناگزیر ہے، جبکہ دہشت گردی نہ صرف قوم بلکہ ریاست کے لیے بھی سنگین خطرہ ہے۔ ان کا کہنا تھا کہ موجودہ سیاسی نظام میں کئی قومی ادارے اور جماعتیں ہائبرڈ صورت اختیار کر چکی ہیں۔
