امریکا نے عالمی قوانین توڑ دیے؟ اقوام متحدہ کا بڑا بیان
یو این کا امریکا پر سخت مؤقف، وینزویلا کارروائی پر تشویش سلامتی کونسل میں ہنگامی اجلاس، وینزویلا پر امریکی اقدام زیرِ بحث
وینزویلا پر امریکی کارروائی بین الاقوامی قانون سے متصادم، اقوام متحدہ کا سخت مؤقف
اقوام متحدہ کے سیکریٹری جنرل انتونیو گوتریس نے وینزویلا کے خلاف امریکی فوجی اقدام کو بین الاقوامی قوانین اور اقوام متحدہ کے چارٹر کے منافی قرار دیتے ہوئے شدید تشویش کا اظہار کیا ہے۔
یہ معاملہ اقوام متحدہ کی سلامتی کونسل کے ہنگامی اجلاس میں زیرِ بحث آیا، جہاں رکن ممالک نے وینزویلا کی تازہ صورتحال اور خطے میں بڑھتی کشیدگی پر گہری فکر کا اظہار کیا۔
اجلاس کے دوران ڈپٹی سیکریٹری جنرل نے سیکریٹری جنرل انتونیو گوتریس کی جانب سے تحریری بیان پڑھ کر سنایا، جس میں بتایا گیا کہ وینزویلا کے صدر اور ان کی اہلیہ اس وقت امریکی تحویل میں ہیں، اور تمام فریقوں پر زور دیا گیا کہ وہ اقوام متحدہ کے چارٹر کی مکمل پاسداری کریں۔
بیان میں واضح کیا گیا کہ دھمکی یا طاقت کے استعمال کی اجازت نہیں دی جا سکتی اور عالمی سطح پر قانون کی بالادستی کو ہر حال میں برقرار رکھنا ناگزیر ہے۔
اقوام متحدہ کے سربراہ نے کہا کہ بین الاقوامی قانون میں منشیات کی اسمگلنگ، قدرتی وسائل کے تنازعات اور انسانی حقوق جیسے مسائل کے حل کے لیے مؤثر قانونی راستے موجود ہیں، جنہیں نظر انداز نہیں کیا جانا چاہیے۔
سیکریٹری جنرل کے مطابق 3 جنوری کو وینزویلا میں کی جانے والی فوجی کارروائی میں بین الاقوامی ضوابط کو ملحوظِ خاطر نہیں رکھا گیا، جبکہ اقوام متحدہ کا چارٹر کسی بھی ریاست کی خودمختاری اور آزادی کے خلاف طاقت یا دھمکی کے استعمال کی سختی سے ممانعت کرتا ہے۔
انہوں نے مزید بتایا کہ وینزویلا حکومت کی درخواست پر مقرر کیے گئے انتخابی ماہرین کے پینل نے انتخابی عمل میں سنگین خامیوں کی نشاندہی کی ہے، اور اقوام متحدہ مسلسل انتخابی نتائج کی شفافیت اور مکمل اشاعت کا مطالبہ کرتی آ رہی ہے۔
انتونیو گوتریس نے زور دیا کہ تمام فریقین جامع، شفاف اور جمہوری مکالمے کا آغاز کریں تاکہ معاشرے کے تمام طبقات کو اپنے مستقبل کا فیصلہ کرنے کا موقع مل سکے۔
سیکریٹری جنرل نے وینزویلا کے پڑوسی ممالک اور عالمی برادری سے بھی اپیل کی کہ وہ یکجہتی، پرامن بقائے باہمی اور سفارتی حل کے اصولوں کے تحت مثبت کردار ادا کریں۔
آخر میں انہوں نے کہا کہ اقوام متحدہ وینزویلا کے عوام کو پرامن حل کی جانب لے جانے والی ہر سنجیدہ کوشش کی مکمل حمایت کے لیے تیار ہے، اور عالمی امن و سلامتی کے تحفظ کے لیے اقوام متحدہ کے چارٹر اور متعلقہ قانونی فریم ورک کا احترام ناگزیر ہے۔
