سال 2026 کا پہلا سپر مون نمودار، وولف مون آسمان پر روشن
سال نو کا پہلا فلکیاتی واقعہ، وولف مون سپر مون کی شکل میں ظاہر 3 اور 4 جنوری کی رات سپر مون، چاند 10 فیصد زیادہ روشن دکھائی دے گا
سال 2026 کا پہلا سپر مون نمودار، وولف مون آسمان پر نمایاں
نئے سال کے آغاز کے ساتھ ہی سال 2026 کا پہلا سپر مون دکھائی دینا شروع ہو گیا ہے، جس کے باعث چاند عام دنوں کے مقابلے میں غیر معمولی طور پر بڑا اور زیادہ روشن نظر آئے گا۔ فلکیاتی روایات کے مطابق اس سپر مون کو وولف مون کہا جاتا ہے۔
یہ سپر مون دراصل اس سلسلے کا آخری مرحلہ ہے جس کا آغاز اکتوبر 2025 میں ہوا تھا، تاہم یہ نئے سال 2026 کا پہلا سپر مون بھی شمار کیا جا رہا ہے۔ ماہرین فلکیات کے مطابق یہ سال کے ابتدائی نمایاں فلکیاتی مظاہر میں سے ایک ہے۔
اعلامیے کے مطابق اس سپر مون کی اہمیت اس لیے بھی بڑھ جاتی ہے کیونکہ اسی دوران کواڈرینٹڈ شہابی بارش اپنے عروج پر ہوتی ہے، جو آسمان پر دلکش مناظر پیدا کرتی ہے۔
پاکستان میں سپر مون آج شام 5 بج کر 51 منٹ پر طلوع ہوا، جب چاند کی روشنی تقریباً 99.8 فیصد تھی۔ یہ فلکی منظر خاص طور پر 3 اور 4 جنوری کی رات کو زیادہ واضح طور پر دیکھا جا سکے گا۔
اس موقع پر زمین اور چاند کے درمیان فاصلہ تقریباً 3 لاکھ 62 ہزار 312 کلومیٹر ریکارڈ کیا گیا، جس کے باعث سپر مون عام پورے چاند کے مقابلے میں 6 سے 7 فیصد بڑا اور تقریباً 10 فیصد زیادہ روشن دکھائی دے گا۔
ماہرین کا کہنا ہے کہ سپر مون عام طور پر تین سے چار مسلسل مواقع پر ظاہر ہوتے ہیں، اور موجودہ سلسلہ 3 جنوری کے سپر مون کے ساتھ اختتام پذیر ہو رہا ہے۔
فلکیاتی ماہرین کے مطابق اگلا سپر مون نومبر 2026 میں متوقع ہے، جو سال 2026 کا دوسرا اور آخری سپر مون ہوگا، اور اس کے بعد سال کے اختتام تک کوئی اور سپر مون نظر نہیں آئے گا۔
