عامر خان کی بیٹی ایرا خان کا باڈی امیج پر کھل کر اظہار، وزن اور خود اعتمادی سے متعلق سچ سامنے آ گیا
بالی ووڈ کے معروف اداکار عامر خان کی صاحبزادی ایرا خان نے حال ہی میں سوشل میڈیا پر ایک اہم اور حساس موضوع پر کھل کر گفتگو کی ہے۔ انہوں نے باڈی امیج، وزن اور خود کو قبول کرنے جیسے مسائل پر بے لاگ انداز میں اپنے خیالات کا اظہار کیا۔
ایرا خان نے اپنی پوسٹ میں واضح طور پر کہا کہ وہ زائد وزن کا شکار ہیں اور اس حقیقت کو تسلیم کرنا ان کے لیے آسان نہیں تھا۔ ان کے مطابق سال 2020 کے دوران وہ موٹاپے، کھانے کی عادات اور خود کو جیسا ہوں ویسا قبول کرنے کی جدوجہد سے گزرتی رہیں، اور اب بھی انہیں بہت سی باتیں سیکھنا باقی ہیں۔
انہوں نے بتایا کہ باڈی امیج پر بات کرنا ان کے لیے ڈپریشن جیسے موضوع سے بھی زیادہ مشکل رہا، تاہم وہ اسے ایک ضروری گفتگو سمجھتی ہیں جس پر خاموشی توڑنا لازم ہے۔
ایرا خان کا کہنا تھا کہ انہوں نے خود کو کئی مرتبہ غیر متوازن، زائد وزن اور موٹاپے کا شکار محسوس کیا، تاہم وہ کسی ایٹنگ ڈس آرڈر میں مبتلا نہیں ہیں۔ انہوں نے یہ بھی واضح کیا کہ ان کی باتیں کسی ماہر کی رائے نہیں بلکہ ذاتی تجربات پر مبنی ہیں۔
ان کے مطابق اس گفتگو کا مقصد ہمدردی یا توجہ حاصل کرنا نہیں بلکہ باڈی امیج اور ذہنی صحت جیسے اہم موضوعات پر کھلے دل سے بات چیت کا آغاز کرنا ہے۔
ایرا خان نے اس بات کا اعتراف بھی کیا کہ باڈی امیج کے مسائل انسان کی خود اعتمادی، ذاتی تعلقات اور پیشہ ورانہ زندگی پر گہرا اثر ڈالتے ہیں، حتیٰ کہ ان کی ازدواجی زندگی بھی اس سے متاثر ہوئی۔
آخر میں انہوں نے تسلیم کیا کہ عمر اور قد کے تناسب سے ان کا وزن زیادہ ہے اور اس حوالے سے بات کرتے وقت وہ اکثر خود کو پُراعتماد محسوس نہیں کرتیں۔
View this post on Instagram
