میسی کی آمد پر کولکتہ اسٹیڈیم میں شدید بدنظمی
بھارتی شہر کولکتہ کے سالٹ لیک اسٹیڈیم میں عالمی شہرت یافتہ فٹبالر لیونل میسی کی آمد پر ناقص انتظامات کے باعث شدید بدنظمی اور توڑ پھوڑ ہوئی جس کے باعث فٹ بالر اپنے مداحوں سے ملے بغیر ہی واپس لوٹ گئے جبکہ واقعے کی تحقیقات کے لیے کمیٹی قائم کردی گئی ہے۔
غیر ملکی میڈیا رپورٹس کے مطابق عالمی شہرت یافتہ اسٹار فٹ بالر لیونل میسی آج بھارت کے تین روزہ دورے کے لیے کولکتہ پہنچے تھے جہاں انہوں نے کولکتہ کے لیک ٹاؤن میں واقع شری بھومی اسپورٹنگ کلب میں اپنے 21 میٹر بلند مجسمے کی نقاب کشائی کی۔ تاہم یہ نقاب کشائی آن لائن کی گئی۔
بعد ازاں لیونل میسی کولکتہ کے اسٹیڈیم پہنچے مگر وہاں شدید بدنظمی اور توڑ پھوڑ کی وجہ سے وہ کچھ منٹ ہی اسٹیڈیم میں موجود رہے، جس پر مداحوں میں مایوسی پھیل گئی۔
بھارتی میڈیا کے مطاق اسٹیڈیم میں موجود ایک شائق نے میڈیا سے گفتگو کرتے ہوئے کہا کہ یہ ایونٹ انتہائی خراب انداز میں منعقد کیا گیا ایونٹ تھا۔ان کے مطابق میسی کے اردگرد سیاسی رہنماؤں اور وزراء کا ہجوم تھا، جس کی وجہ سے عام شائقین انہیں دیکھ بھی نہ سکے۔
