ایران کا سخت مؤقف: آبنائے ہرمز تک رسائی نئے قوانین سے مشروط

ایرانی پارلیمنٹ کی نیشنل سیکیورٹی کمیٹی کے سربراہ ابراہیم عزیزی نے حالیہ بیان میں خطے کی صورتحال پر سخت ردعمل دیتے ہوئے آبنائے ہرمز کے مستقبل سے متعلق اہم اشارے دیے ہیں۔

سوشل میڈیا پر جاری اپنے پیغام میں انہوں نے کہا کہ اگر خطے میں میری ٹائم نظام میں تبدیلی آتی ہے تو یہ سابق امریکی صدر ڈونلڈ ٹرمپ کے "رجیم چینج” کے خواب کی تکمیل کے مترادف ہوگا۔

ابراہیم عزیزی نے واضح کیا کہ آبنائے ہرمز مستقبل میں دوبارہ کھولی جائے گی، تاہم اس تک رسائی ہر کسی کے لیے نہیں ہوگی۔ ان کے مطابق صرف وہی ممالک یا فریقین اس اہم بحری راستے سے فائدہ اٹھا سکیں گے جو ایران کے نئے متعارف کردہ قوانین پر عمل کریں گے۔

انہوں نے مزید کہا کہ گزشتہ کئی دہائیوں سے جاری ایرانی مہمان نوازی کا دور اب ختم ہو چکا ہے اور مستقبل میں پالیسیوں میں سختی دیکھنے کو ملے گی۔

یہ بیان ایسے وقت میں سامنے آیا ہے جب خطے میں بحری سلامتی اور عالمی تجارت کے اہم راستوں کے حوالے سے خدشات بڑھ رہے ہیں، خصوصاً آبنائے ہرمز کی اسٹریٹجک اہمیت کے پیش نظر۔