عمان مذاکرات: ایران کا یورینیم افزودگی روکنے سے انکار، امریکا سے اختلاف برقرار

مسقط مذاکرات: ایران کا یورینیم افزودگی روکنے سے انکار

ایران نے عمان کے دارالحکومت مسقط میں ہونے والے مذاکرات کے دوران امریکا کی جانب سے یورینیم افزودگی مکمل طور پر روکنے کے مطالبے کو مسترد کر دیا ہے۔

علاقائی سفارتی ذرائع کے مطابق ایرانی حکام نے واضح کیا ہے کہ وہ افزودگی کی سطح، یورینیم کی خالصیت یا ممکنہ علاقائی کنسورشیم جیسے امور پر بات چیت کے لیے آمادگی رکھتے ہیں، تاہم افزودگی کے عمل کو ختم کرنا ان کے لیے قابلِ قبول نہیں۔

ذرائع کا کہنا ہے کہ تہران کو یہ تاثر ملا ہے کہ امریکی مذاکرات کار ایران کے مؤقف اور تکنیکی نکات کو بہتر طور پر سمجھنے کی کوشش کر رہے ہیں، جس سے بات چیت کے ماحول میں کچھ بہتری آئی ہے۔

دوسری جانب امریکی وفد نے ایرانی مطالبات پر محدود لچک دکھائی، جبکہ مسقط میں جاری مذاکرات کے دوران ایران کے میزائل پروگرام پر کسی قسم کی گفتگو نہیں کی گئی۔

سفارتی مبصرین کے مطابق یہ مذاکرات خطے میں کشیدگی کم کرنے کی کوششوں کا حصہ ہیں اور آئندہ دور میں مزید اہم پیش رفت متوقع ہے۔