سردیوں میں وزن کم کرنا کیوں آسان ہوتا ہے؟ ماہرین نے 3 بڑی وجوہات بتا دیں

سردیوں میں وزن کم کرنا کیوں آسان ہوتا ہے؟ ماہرین صحت نے 3 اہم وجوہات بتا دیں

عام طور پر یہ سمجھا جاتا ہے کہ موسم سرما میں جسمانی سرگرمی کم ہونے اور مرغن و چکنائی والی غذاؤں کے زیادہ استعمال کی وجہ سے وزن بڑھ جاتا ہے، لیکن ماہرین صحت کا کہنا ہے کہ حقیقت اس کے برعکس ہے۔ ان کے مطابق سردیوں کا موسم وزن کم کرنے کے لیے نہایت موزوں اور مؤثر ثابت ہو سکتا ہے۔

ماہرین کے مطابق موسم سرما میں جسم کے اندر کئی قدرتی عمل ایسے متحرک ہو جاتے ہیں جو وزن کم کرنے میں مددگار ثابت ہوتے ہیں۔ اس حوالے سے انہوں نے تین بنیادی وجوہات کی نشاندہی کی ہے۔

پہلی وجہ یہ ہے کہ سردیوں میں انسانی نظامِ ہاضمہ زیادہ مضبوط اور فعال ہو جاتا ہے۔ اس دوران معدہ خوراک کو بہتر طریقے سے ہضم کرتا ہے، جس سے غذائی اجزاء مؤثر انداز میں جسم کے لیے قابلِ استعمال بن جاتے ہیں۔

دوسری اہم وجہ یہ ہے کہ جب ہاضمہ درست طریقے سے کام کرتا ہے تو خوراک سے حاصل ہونے والی توانائی اور غذائی عناصر جسم میں غیر ضروری چربی بننے کے بجائے بہتر انداز میں جذب ہو جاتے ہیں۔ اس سے نہ صرف جسم کو طاقت ملتی ہے بلکہ اضافی کیلوریز چربی کی صورت میں جمع ہونے سے بھی بچتی ہیں۔

تیسری وجہ درجہ حرارت میں کمی ہے، جو جسم کے تھرموجنیسیس (Thermogenesis) کے عمل کو تیز کرتی ہے۔ اس عمل کے تحت جسم خود کو گرم رکھنے کے لیے زیادہ کیلوریز جلاتا ہے، جس کے نتیجے میں قدرتی طور پر چربی کم ہونے لگتی ہے۔

ماہرین صحت کا کہنا ہے کہ اگر سردیوں کے موسم میں متوازن غذا اور درست ڈائٹ پلان کے ساتھ وزن کم کرنے کی کوشش کی جائے تو اس کے نتائج نسبتاً زیادہ بہتر اور دیرپا ثابت ہو سکتے ہیں۔

ان کے مطابق سردیوں میں موسمی پھل، غذائیت سے بھرپور سبزیاں اور فائبر والی غذاؤں کا استعمال وزن کم کرنے کے عمل کو مزید تیز کر دیتا ہے۔ یہ غذائیں نہ صرف معدے کو صحت مند رکھتی ہیں بلکہ جسم کو درکار توانائی بھی فراہم کرتی ہیں، جس سے غیر ضروری بھوک اور زیادہ کھانے کی عادت پر قابو پایا جا سکتا ہے۔

ماہرین کا کہنا ہے کہ سردیوں کا موسم دراصل وزن کم کرنے کا قدرتی موقع ہوتا ہے، بس ضرورت اس بات کی ہے کہ اس دوران صحت مند طرزِ زندگی اور مناسب خوراک کو اپنایا جائے۔