ایچ ای سی کے جعلی نوٹیفکیشن نے پنجاب کے طلباء میں تشویش پھیلا دی
ہائر ایجوکیشن کمیشن آف پاکستان (HEC) سے منسوب ایک نوٹیفکیشن سوشل میڈیا پر تیزی سے وائرل ہوا، جس کے باعث پنجاب بھر کے طلباء میں شدید کنفیوژن پیدا ہو گئی۔
وائرل ہونے والے اس نوٹیفکیشن میں یہ دعویٰ کیا گیا کہ پنجاب کے سرکاری اور نجی کالجز اور یونیورسٹیز میں زیرِ تعلیم طلباء کے لیے امتحانات میں شرکت کے لیے حاضری کی شرط ختم کر دی گئی ہے۔
جعلی نوٹیفکیشن میں مزید کہا گیا کہ تعلیمی ادارے کم حاضری کی بنیاد پر طلباء کو امتحان دینے سے نہیں روک سکتے، جبکہ حاضری سے متعلق کسی بھی قسم کا جرمانہ عائد کرنے پر بھی پابندی عائد کر دی گئی ہے۔
اس نوٹیفکیشن میں یہ انتباہ بھی شامل تھا کہ ہدایات پر عمل نہ کرنے والے اداروں کے خلاف سخت قانونی کارروائی کی جائے گی۔ وائرل دستاویز پر سیکشن آفیسر بابر خان گوندل کا نام اور دستخط بھی موجود تھے، جس سے کئی افراد دھوکے میں آ گئے۔
اصل حقیقت سامنے آ گئی
ہائر ایجوکیشن کمیشن آف پاکستان نے اس معاملے پر وضاحتی بیان جاری کرتے ہوئے واضح کیا ہے کہ سوشل میڈیا پر گردش کرنے والا یہ نوٹیفکیشن جعلی ہے اور ایچ ای سی کی جانب سے جاری نہیں کیا گیا۔
ایچ ای سی نے طلباء، والدین اور تعلیمی اداروں کو خبردار کیا ہے کہ وہ غیر مصدقہ اور گمراہ کن معلومات پر یقین نہ کریں اور ایسی خبروں کو آگے شیئر کرنے سے اجتناب کریں۔
کمیشن نے تمام متعلقہ فریقین کو ہدایت کی ہے کہ اعلیٰ تعلیم سے متعلق پالیسیوں، نوٹیفکیشنز اور اپ ڈیٹس کے لیے صرف ایچ ای سی کی آفیشل ویب سائٹ اور اس کے تصدیق شدہ سوشل میڈیا پلیٹ فارمز پر ہی اعتماد کیا جائے۔
