امریکی ریاست ورجینیا میں پہلی بار خاتون گورنر اور مسلم نائب گورنر کی حلف برداری

امریکا میں تاریخی پیش رفت: ورجینیا میں پہلی مسلم نائب گورنر اور خاتون گورنر نے عہدہ سنبھال لیا

امریکا کی ریاست ورجینیا میں سیاسی تاریخ کا ایک اہم اور یادگار باب رقم ہو گیا، جہاں پہلی مرتبہ ایک مسلم خاتون غزالہ ہاشمی نے نائب گورنر کے عہدے کا حلف قرآنِ پاک پر اٹھایا۔ اسی تقریب میں ایبی گیل اسپین برجر نے بطور گورنر ذمہ داریاں سنبھال کر ریاست کی پہلی خاتون گورنر بننے کا اعزاز حاصل کیا۔

یہ تقریب ورجینیا کی تاریخ میں کئی حوالوں سے منفرد رہی، کیونکہ پہلی بار ریاست کے اٹارنی جنرل کے منصب پر سیاہ فام رہنما جے جونز نے حلف لیا۔ اس طرح قیادت میں تنوع اور شمولیت کی ایک نئی مثال قائم ہوئی۔

غزالہ ہاشمی نہ صرف پہلی مسلم بلکہ ریاست کی پہلی خاتون نائب گورنر بھی ہیں۔ حلف برداری کے موقع پر بین المذاہب ہم آہنگی کو فروغ دینے کے لیے ایک خصوصی انٹرفیتھ پریئر بریک فاسٹ کا انعقاد کیا گیا، جہاں امام شریف نے دعا کروائی۔

تقریب میں مختلف سیاسی و سماجی شخصیات نے شرکت کی، جن میں سینیٹر صدام ازلان سلیم اور سینیٹر کنعان شامل تھے۔ اس موقع پر ایڈمز اسکاؤٹنگ امریکا اور گرلز اسکاؤٹس کی جانب سے خصوصی پریڈ بھی پیش کی گئی، جس کی قیادت رضوان جاکا، احسن اللہ، بیتھنی رشید اور دیگر نمائندوں نے کی۔

تقریب سے خطاب کرتے ہوئے رہنماؤں نے اتحاد، تنوع، مساوات اور عوامی خدمت کو اپنی ترجیحات قرار دیا۔ ریاستی گورنر کے ایشین امریکن ایڈوائزری بورڈ کے چیئرمین منصور قریشی نے امید ظاہر کی کہ نئی قیادت اور پوری کابینہ ورجینیا کے تمام شہریوں، بالخصوص جنوبی ایشیائی کمیونٹی، کی بلا امتیاز خدمت کرے گی۔