ٹرمپ کے دعوؤں سے نیٹو بحران کا شکار، گرین لینڈ میں فوجی مشقیں شروع

گرین لینڈ پر ٹرمپ کے دعوؤں کے بعد یورپی ممالک کا فوجی قدم، نیٹو سرگرم

امریکی صدر ڈونلڈ ٹرمپ کی جانب سے گرین لینڈ کو ممکنہ طور پر امریکا کا حصہ بنانے سے متعلق بیانات کے بعد یورپی ممالک نے سیکیورٹی اقدامات تیز کر دیے ہیں۔ یورپی اتحادیوں نے صورتحال کے پیش نظر گرین لینڈ میں محدود تعداد میں فوجی اہلکار تعینات کرنے کا فیصلہ کیا ہے۔

بین الاقوامی میڈیا رپورٹس کے مطابق نیٹو سے وابستہ کئی ممالک ڈنمارک کے ساتھ مشترکہ فوجی مشقوں میں حصہ لینے کے لیے گرین لینڈ میں اپنی افواج بھیج رہے ہیں۔ جرمنی، سویڈن، فرانس اور ناروے نے تصدیق کی ہے کہ وہ رواں ہفتے ڈنمارک کی فوج کے ساتھ مل کر دفاعی مشقیں کریں گے۔

اس کے علاوہ کینیڈا اور فرانس نے بھی اعلان کیا ہے کہ وہ آنے والے ہفتوں میں گرین لینڈ میں اپنے قونصل خانے قائم کرنے کا ارادہ رکھتے ہیں، جسے سفارتی اور اسٹریٹجک سطح پر اہم پیش رفت قرار دیا جا رہا ہے۔

ڈنمارک کی وزیر اعظم اس سے قبل خبردار کر چکی ہیں کہ گرین لینڈ پر کسی بھی قسم کی جارحیت نہ صرف یورپ بلکہ پورے نیٹو اتحاد کے لیے سنگین خطرہ بن سکتی ہے۔ ان کا کہنا تھا کہ ایسا کوئی اقدام نیٹو اتحاد کی بنیادیں ہلا سکتا ہے۔

واضح رہے کہ ڈونلڈ ٹرمپ کی جانب سے گرین لینڈ سے متعلق متنازع بیانات نے نیٹو ممالک کے درمیان تشویش پیدا کر دی ہے اور سیکیورٹی اتحاد کو ایک نئے بحران کا سامنا ہے۔