ترکیہ کا اسرائیل کو انتباہ: ایران کی داخلی صورتحال سے فائدہ اٹھانے کی کوشش ناکام ہوگی، حاقان فدان

ترک وزیر خارجہ حاقان فدان نے اسرائیل کو خبردار کرتے ہوئے کہا ہے کہ وہ ایران میں جاری داخلی کشیدگی سے فائدہ اٹھانے کی جو کوششیں کر رہا ہے، وہ کامیاب نہیں ہوں گی۔ ترک میڈیا کو دیے گئے ایک انٹرویو میں انہوں نے کہا کہ ایران میں ہونے والے احتجاجی مظاہروں کو بعض علاقائی اور عالمی حریف اپنے مقاصد کے لیے استعمال کرنے کی کوشش کر رہے ہیں۔

حاقان فدان کا کہنا تھا کہ اسرائیل نہ صرف ایران کی صورتحال سے فائدہ اٹھانے کی کوشش کر رہا ہے بلکہ وہ غزہ میں جنگ بندی معاہدے کے اگلے مرحلے میں بھی رکاوٹیں پیدا کر رہا ہے۔ انہوں نے واضح کیا کہ ترکیہ غزہ میں انسانی امداد کی فراہمی اور تعمیر نو کے عمل میں فعال کردار ادا کرنے کے لیے مکمل طور پر تیار ہے۔

دوسری جانب ایران میں احتجاجی مظاہرے مسلسل پھیلتے جا رہے ہیں۔ تازہ اطلاعات کے مطابق مظاہرے 100 سے زائد شہروں تک پہنچ چکے ہیں، جن میں کم از کم 47 افراد ہلاک جبکہ تقریباً 2 ہزار 500 افراد کو گرفتار کر لیا گیا ہے۔ مختلف شہروں میں املاک کو نقصان پہنچنے اور سیکیورٹی اہلکاروں کے زخمی ہونے کی اطلاعات بھی موصول ہوئی ہیں۔

ایران میں پرتشدد مظاہروں کو 13 دن مکمل ہو چکے ہیں، جبکہ حکام نے صورتحال کے پیش نظر ایک بار پھر ملک بھر میں انٹرنیٹ سروس معطل کر دی ہے تاکہ اطلاعات کے پھیلاؤ اور ممکنہ بدامنی کو کنٹرول کیا جا سکے۔

ایرانی فوج نے اپنے بیان میں کہا ہے کہ کمانڈر انچیف کی قیادت میں مسلح افواج نہ صرف خطے میں دشمن کی سرگرمیوں پر کڑی نظر رکھے ہوئے ہیں بلکہ قومی مفادات اور عوامی و سرکاری املاک کے تحفظ کو بھی یقینی بنائیں گی۔

ایرانی فوج کا مزید کہنا تھا کہ 12 روزہ جنگ کے دوران ایرانی بچوں کے خون سے ہاتھ رنگنے والے عناصر اب ایرانی عوام کی حمایت کا جھوٹا دعویٰ کر کے ایک اور فتنہ کھڑا کرنے کی سازش کر رہے ہیں۔ بیان میں زور دیا گیا کہ ایسے عناصر کے عزائم کو ہر صورت ناکام بنایا جائے گا۔

یہ صورتحال خطے میں بڑھتی ہوئی کشیدگی اور سفارتی محاذ پر سرگرمیوں کی عکاسی کر رہی ہے، جہاں ترکیہ اور ایران دونوں اسرائیل کے کردار کو شک کی نگاہ سے دیکھ رہے ہیں، جبکہ غزہ اور ایران کے معاملات ایک بار پھر عالمی توجہ کا مرکز بن چکے ہیں۔