امریکہ کا بڑا دعویٰ: وینزویلا کے صدر نکولس مادورو اور اہلیہ گرفتار

امریکہ کا دعویٰ: وینزویلا کے صدر نکولس مادورو اور اہلیہ کو حراست میں لے لیا گیا

امریکی صدر ڈونلڈ ٹرمپ نے دعویٰ کیا ہے کہ امریکہ نے وینزویلا کے خلاف ایک بڑی اور غیر معمولی کارروائی کی ہے، جس کے دوران وینزویلا کے صدر نکولس مادورو اور ان کی اہلیہ کو گرفتار کر کے ملک سے باہر منتقل کر دیا گیا ہے۔

صدر ٹرمپ نے اپنے سوشل میڈیا پلیٹ فارم ٹروتھ سوشل پر جاری بیان میں کہا کہ امریکی حکام نے وینزویلا اور اس کی قیادت کے خلاف کامیاب آپریشن کیا ہے۔ ان کے مطابق اس کارروائی کے نتیجے میں صدر مادورو اور ان کی اہلیہ کو تحویل میں لے کر بیرونِ ملک منتقل کیا گیا۔

امریکی صدر کا کہنا تھا کہ یہ آپریشن امریکی قانون نافذ کرنے والے اداروں کے باہمی تعاون سے انجام دیا گیا، جبکہ اس حوالے سے مزید تفصیلات جلد عوام کے سامنے لائی جائیں گی۔ ٹرمپ نے اعلان کیا کہ اس معاملے پر آج صبح 11 بجے مار اے لاگو میں پریس کانفرنس کی جائے گی۔

یہ بیان امریکہ اور وینزویلا کے تعلقات میں ایک اہم اور غیر متوقع پیش رفت کے طور پر دیکھا جا رہا ہے، تاہم اس دعوے کی فوری طور پر کسی آزاد یا بین الاقوامی ذریعے سے تصدیق نہیں ہو سکی۔ امریکی صدر کے مطابق مکمل معلومات پریس کانفرنس کے دوران فراہم کی جائیں گی۔