واٹس ایپ میں نیا فیچر، تصاویر اور ویڈیوز اب غلطی سے ڈیلیٹ نہیں ہوں گی

واٹس ایپ کا نیا اسمارٹ اسٹوریج فیچر متعارف، ڈیٹا مینجمنٹ اب پہلے سے زیادہ آسان

میٹا کے زیرِ انتظام میسجنگ ایپ واٹس ایپ نے صارفین کے لیے فون اسٹوریج کو منظم کرنے کا ایک نیا اور جدید فیچر متعارف کرانا شروع کر دیا ہے، جس کا مقصد غیر ضروری ڈیٹا صاف کرتے ہوئے اہم مواد کو محفوظ رکھنا ہے۔ اس اپڈیٹ کو اسمارٹ کلیئر اسٹوریج ٹول کا نام دیا جا رہا ہے۔

نئے فیچر کے ذریعے صارفین اب واٹس ایپ کی اسٹوریج کو زیادہ واضح اور محتاط انداز میں کنٹرول کر سکیں گے۔ اس ٹول میں چیٹس، اسٹار شدہ پیغامات اور مختلف میڈیا فائلز جیسے تصاویر اور ویڈیوز کو الگ الگ کیٹیگریز میں دکھایا جاتا ہے، تاکہ کسی اہم فائل یا پیغام کے حذف ہونے کا خدشہ کم ہو جائے۔

ٹیکنالوجی ویب سائٹ WABetaInfo کے مطابق جب صارف چیٹ ڈیٹا ڈیلیٹ کرنے کا آپشن منتخب کرے گا تو اب ایک سادہ کنفرمیشن پیغام کے بجائے ایک مکمل تفصیلی اسکرین سامنے آئے گی۔ اس اسکرین میں عام پیغامات، محفوظ (اسٹار شدہ) مواد اور میڈیا فائلز کو علیحدہ حصوں میں دکھایا جائے گا، جس سے صارف کو واضح طور پر معلوم ہوگا کہ کون سا ڈیٹا حذف ہونے جا رہا ہے۔

اس اسمارٹ ٹول کی مدد سے صارفین یہ بھی انتخاب کر سکیں گے کہ وہ کون سی فائلز ڈیلیٹ کرنا چاہتے ہیں، مثلاً تصاویر، ویڈیوز، ڈاکیومنٹس، آڈیو فائلز، وائس نوٹس یا اسٹیکرز۔ اس کے ساتھ ساتھ یہ معلومات بھی فراہم کی جائیں گی کہ ڈیلیٹ کرنے کے بعد فون میں کتنی اسٹوریج خالی ہو جائے گی۔

یہ نیا فیچر واٹس ایپ کی چیٹ انفارمیشن اسکرین یا براہِ راست مین چیٹ لسٹ کے ذریعے استعمال کیا جا سکتا ہے۔ فی الحال یہ اسمارٹ اسٹوریج فیچر مرحلہ وار متعارف کرایا جا رہا ہے اور ابتدائی طور پر iOS صارفین کے لیے دستیاب ہے، جبکہ امکان ہے کہ جلد اینڈرائیڈ صارفین کو بھی یہ سہولت فراہم کر دی جائے گی۔