پی ٹی آئی کی نئی احتجاجی حکمتِ عملی، وزیراعلیٰ خیبرپختونخوا لاہور پہنچ گئے
پاکستان تحریکِ انصاف نے نئے احتجاجی مرحلے کے آغاز کا عندیہ دیتے ہوئے لاہور میں سرگرمیاں تیز کر دی ہیں۔ اسی سلسلے میں خیبرپختونخوا کے وزیرِ اعلیٰ سہیل آفریدی دو روزہ دورے پر لاہور پہنچ گئے، جہاں آج شام لبرٹی چوک پر پارٹی کے عوامی اجتماع کی توقع کی جا رہی ہے۔
پی ٹی آئی کی جانب سے سوشل میڈیا پلیٹ فارم ایکس پر جاری کی گئی ایک ویڈیو میں دیکھا جا سکتا ہے کہ پارٹی کارکنوں اور حامیوں نے وزیراعلیٰ کی گاڑی پر پھول نچھاور کیے، جب وہ سینئر رہنما لطیف کھوسہ کی رہائش گاہ پہنچے۔
لاہور آمد کے بعد راوی ٹول پلازہ کے قریب صحافیوں سے گفتگو کرتے ہوئے وزیراعلیٰ خیبرپختونخوا نے کہا کہ انہیں ذاتی طور پر شہر میں داخلے کی اجازت دی گئی، تاہم ان کے ہمراہ آنے والی کم از کم سات گاڑیوں کو راستے میں روک لیا گیا۔
انہوں نے الزام عائد کیا کہ منڈی بہاؤالدین سے آنے والے پی ٹی آئی کارکنوں کو بھیرہ کے مقام پر لاہور کی جانب بڑھنے سے روک دیا گیا، سڑکیں بند کی گئیں اور متعدد کارکنوں کو حراست میں لیا گیا۔ اس موقع پر صحافیوں نے نشاندہی کی کہ میڈیا کی گاڑیوں کو بھی لاہور میں داخل ہونے کی اجازت نہیں دی گئی۔
وزیراعلیٰ کا کہنا تھا کہ ایسے اقدامات جمہوری طرزِ حکمرانی کے منافی ہیں۔ پنجاب کی وزیراعلیٰ مریم نواز سے متعلق سوال پر انہوں نے کہا کہ اس قسم کی پابندیاں دو صوبوں کے درمیان کشیدگی میں اضافے کا سبب بن سکتی ہیں، جس کے نتائج مثبت نہیں ہوں گے۔
دوسری جانب محکمہ داخلہ پنجاب نے وزیراعلیٰ خیبرپختونخوا کے دورہ لاہور کے دوران سکیورٹی کے سخت انتظامات کرنے کی ہدایات جاری کر دی ہیں۔ جاری مراسلے کے مطابق سہیل آفریدی 26 سے 28 دسمبر تک پنجاب میں قیام کریں گے۔
محکمہ داخلہ کے مطابق دورے کے دوران وزیراعلیٰ خیبرپختونخوا مختلف سرکاری و غیر سرکاری مصروفیات میں حصہ لیں گے، پنجاب اسمبلی کے اراکین سے ملاقات کریں گے جبکہ صحافیوں اور طلبہ سے بھی گفتگو متوقع ہے۔ مراسلے میں یہ بھی بتایا گیا ہے کہ وزیراعلیٰ کوٹ لکھپت جیل کا دورہ بھی کریں گے۔
